Tanınmış ümumi cərrah - transplantoloq Tariyel Nadirov və komandası daha bir uğurlu orqan nəqli əməliyyatına imza atıb.

Aztibb.az xəbər verir ki, uzun müddətdir xroniki böyrək çatışmazlığından əziyyət çəkən, hər həftə 3 dəfə dializ aparatına bağlanaraq yaşam mübarizəsi verən Mehdi adlı pasiyent, anasının böyük fədakarlığı və həkimlərin yüksək peşəkarlığı sayəsində yenidən sağlam həyata qayıdıb.

Təxminən bir il əvvəl ikitərəfli nefrektomiya əməliyyatı keçirən (hər iki böyrəyi çıxarılan) pasiyent, yenidən həyata tutunmaq ümidi ilə həkimə müraciət edib. Müraciət zamanı xəstədə alt urinar sistem problemləri aşkarlanıb. Dr. Tariyel Nadirovun rəhbərliyi ilə əməliyyatın risklərini minimuma endirmək məqsədilə xəstəyə öncə ətraflı urodinamik müayinələr tətbiq edilib. Eyni zamanda, donor olmaq istəyən fədakar ananın da bütün tibbi yoxlanışları tam və dərindən həyata keçirilib. Müayinələrin müsbət nəticəsindən sonra transplantasiya komandası hərəkətə keçib.

Uğurla icra olunan transplantasiya əməliyyatından sonra gənc pasiyent yenidən normal həyat ritminə qovuşub. Həm ananın, həm də oğulun səhhətində hər şeyin tam qaydasında olduğu qeyd edilib.