Qızılca kəskin yoluxucu virus xəstəliyidir. Bu xəstəliyə yoluxma bütün yaş dövrlərində rast gəlinir, 5 yaşa qədər olan uşaqlar arasında daha tez-tez müşahidə olunur. Virus orqanizmə hava damcı yolu ilə daxil olur.

 

Aztibb.az xəbər verir ki, törədicinin giriş qapısı yuxarı tənəffüs yollarının selikli qişasıdır. Xəstəlik zamanı ümumi intoksikasiya, yuxarı tənəffüs yollarının katarı, populyoz, ləkəli səpkilər meydana çıxır.

Xəstəliyin gedişi 3 mərhələdən ibarətdir: kataral, səpki, piqmentasiya. İnkubasiya dövrü 6-17 gündür.

Hazırda ölkəmizdə 1 və 6 yaşda QPM peyvəndi olunmaqla uşaqlar bu xəstəlikdən qorunur.

 

Məxmərək - səpkilər, qızdırma və limfadenopatiya (limfa düyünlərinin böyüməsi) yaradan bir infeksiyadır. Əsasən uşaqlıq yaşında keçirilir və ən ağır 3 gün davam edir.

 

Xəstəliyin əvvəlində uşağın hərarəti bir qədər qalxır, ümumi zəiflik, bəzən burun tənəffüsünün çətinləşməsi, zökəm, öskürək əmələ gəlir, ənsə və arxa boyun limfa vəziləri böyüyür. İştahasızlıq, qızdırma, baş ağrısı baş verir. Daha sonra, əvvəlcə sifətdə, sonrakı bir neçə saat ərzində isə bütün bədənə yayılan qırmızımtıl ləkələr (ölçüləri 5–10 mm olan) şəklində səpgilər əmələ gəlir.

Parotit virus infeksiyası olub, tüpürcək vəzilərinin, mədəaltı vəzinin, oğlanlarda xayaların, qızlarda yumurtalıqların, beyin qişalarının və s. toxumaların zədələnməsi ilə müşayiət edilir.

 

Xəstəlik hərarətin 38-39 dərəcə və daha artıq qalxması ilə başlayır, ağzı açarkən və çeynəmə zamanı ağrı hiss olunur, qulaqaltı tüpürcək vəzilərinin ölçüsü böyüyür. Daha sonra çənəaltı və dilaltı tüpürcək vəziləri də böyüyə bilər.

 

Epidemik parotitin ən yaxşı profilaktikası - ona qarşı peyvəndin edilməsindən ibarətdir.