Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla xanım Əliyevanın təşəbbüsü ilə irəli sürülmüş aksiya çərçivəsində ölkə üçün prioritet sahələrdən biri olan ana, qadın və uşaq sağlamlığının yaxşılaşdırılması məqsədilə TƏBİB tərəfindən hərəkət məhdudiyyəti olan qız uşaqlarının evdə tibbi müayinələrinin aparılmasına başlanılıb.

TƏBİB-dən Aztibb.az-a bildirilib ki, qurum tərəfindən həyata keçirilən uşaq sağlamlığının monitorinqi proqramı çərçivəsində hərəkət məhdudiyyətli əlilliyi olan uşaqların ev şəraitində ixtisaslı həkimlər tərəfindən tibbi müayinələri təşkil olunur.

Bu istiqamətdə Şirvan Şəhər Mərkəzi Xəstəxanasının həkim briqadası tərəfindən hərəkət məhdudiyyətli əlilliyi olan uşaqlar evlərində ziyarət edilərək tibbi müayinədən keçirilib.

Müayinələr zamanı uşaqların sağlamlıq vəziyyəti qiymətləndirilir, mövcud xəstəliklər və risk faktorları müəyyənləşdirilir, zəruri hallarda əlavə müayinələr və müalicə tədbirləri tövsiyə olunur. Eyni zamanda, uşaqların tibbi-sosial reabilitasiya ehtiyacları nəzərdən keçirilir, yeniyetmə qızların reproduktiv sağlamlığı da daxil olmaqla yaşa uyğun sağlamlıq göstəriciləri qiymətləndirilir.

Müayinələr sahə həkiminin iştirakı ilə pediatr, oftalmoloq, otorinolarinqoloq, nevroloq, ginekoloq, stomatoloq və digər ixtisaslı həkimlər tərəfindən aparılır.

Multidisiplinar yanaşmanın təmin olunması məqsədilə TƏBİB Azərbaycan Respublikasının Əmək və Əhalinin Sosial Müdafiəsi Nazirliyinin tabeliyində fəaliyyət göstərən Sosial Xidmətlər Agentliyi ilə əməkdaşlıq edir. Əməkdaşlıq çərçivəsində sosial işçilərin də prosesə cəlb olunması uşaqların həm tibbi, həm də sosial ehtiyaclarının kompleks şəkildə qiymətləndirilməsinə və müvafiq dəstək tədbirlərinin planlaşdırılmasına imkan yaradır.