Təkrarlayan yüksək qızdırma və sidik yolu infeksiyası şikayətləri ilə müraciət edən 8 yaşlı qız uşağının müayinəsi zamanı hər iki böyrəkdə ciddi fəsadlar aşkarlanıb. Aparılan ultrasəs müayinəsi (USM) nəticəsində xəstədə ikitərəfli ureterohidronefroz (sidik axarları və böyrək ləyənlərinin genişlənməsi) və keçirilmiş infeksiyalara bağlı böyrək toxumasında zədələnmələr (skarlar) müəyyən edilib.

Aztibb.az xəbər verir ki, aktiv xəstəlik ocağı müalicə olunduqdan sonra icra edilən işəmə sistoqrafiyası (VCUG) ilə uşaqda ikitərəfli yüksək dərəcəli vezikoureteral reflyuks aşkarlayıb. Həmçinin böyrəyin süzmə funksiyasını göstərən kreatinin göstəricisi yaşına görə yüksək (1 mq/dl) tapılıb. Xəstə uğurlu cərrahi əməliyyata alınıb və reflyuks tamamilə aradan qaldırılıb.

Həkimlər xəstənin tibbi tarixçəsini (anamnezini) incələyərkən əvvəlki dövrlərdə icra olunmuş bir neçə ciddi taktik səhvi üzə çıxarıblar.

Uşaqda təkrarlayan sidik yollarının infeksiyası dəfələrlə müalicə edilib, lakin heç vaxt səbəbi araşdırılmayıb, dəfələrlə lazımsız KT müayinəsi aparılıb və bir çox hallarda sidik analizi olmadan antibiotik və bitki tərkibli preparatlar təyin edilib.

Uşaq urologiyası uzmanı, Dr. Pərviz Hacıyev bildirib ki, icra etdikləri əməliyyatla uşağı bundan sonra yarana biləcək infeksiyalardan və böyrəyin daha da sıradan çıxması təhlükəsindən qoruyublar.

Həkim qeyd edib ki, keçmiş illərdə gecikmiş və səhv müalicələr ucbatından böyrəyin aldığı zədələri geri qaytarmaq, bərpa etmək artıq qeyri-mümkündür.