Hər il 1 iyun tarixində dünyada Uşaqların Beynəlxalq Müdafiəsi Günü qeyd olunur. Bu günün əsas məqsədi uşaqların hüquqlarının qorunmasına diqqət çəkmək, onların sağlam, təhlükəsiz və xoşbəxt mühitdə böyüməsinin vacibliyini vurğulamaqdır. Uşaqlar cəmiyyətin gələcəyidir və onların fiziki, psixoloji, mənəvi inkişafı sağlam cəmiyyət quruculuğunun əsas şərtlərindən biridir.
Aztibb.az bu əlamətdar gündə mütəxəssislərin bəzi sağlamlıq tövsiyələrini valideyinlərlə paylaşır:
Müasir dövrdə uşaqların sağlamlığının qorunması təkcə tibb işçilərinin deyil, ilk növbədə valideynlərin üzərinə düşən mühüm məsuliyyətdir. Sağlam həyat tərzinin əsasları məhz uşaqlıq yaşlarından formalaşır. Mütəxəssislər valideynlərə aşağıdakı məqamlara xüsusi diqqət yetirməyi tövsiyə edirlər:
Düzgün və balanslaşdırılmış qidalanma
Uşaqların gündəlik qida rasionunda meyvə, tərəvəz, süd məhsulları, zülal və vitaminlərlə zəngin qidalar üstünlük təşkil etməlidir. Fast-food məhsulları, qazlı içkilər və həddindən artıq şirniyyat istifadəsi məhdudlaşdırılmalıdır.
Fiziki aktivliyin artırılması
Hərəkət uşaqların sağlam böyüməsi üçün vacib amildir. Açıq havada oyunlar, idman məşğələləri və aktiv həyat tərzi həm fiziki inkişafı dəstəkləyir, həm də piylənmə riskini azaldır.
Peyvəndlərin vaxtında aparılması
Peyvəndlər uşaqları bir çox təhlükəli infeksion xəstəliklərdən qoruyur. Valideynlər Milli Peyvənd Təqviminə uyğun olaraq uşaqların peyvəndlərinin vaxtında aparılmasına diqqət yetirməlidirlər.
Yuxu rejiminin qorunması
Yaşa uyğun kifayət qədər yuxu uşaqların beyin inkişafı, immun sisteminin güclənməsi və emosional sağlamlığı üçün böyük əhəmiyyət daşıyır. Uşaqların gündəlik yuxu rejimi sabit olmalıdır.
Ekran qarşısında keçirilən vaxtın məhdudlaşdırılması
Telefon, planşet və kompüterdən həddindən artıq istifadə görmə problemləri, diqqət pozğunluğu və fiziki passivlik yarada bilər. Uşaqların ekran qarşısında keçirdiyi vaxta nəzarət edilməlidir.
Psixoloji sağlamlığa diqqət
Uşağın özünü təhlükəsiz və sevilən hiss etməsi onun sağlam inkişafının vacib şərtidir. Valideynlər övladları ilə açıq ünsiyyət qurmalı, onların hiss və düşüncələrinə hörmətlə yanaşmalıdırlar.
Müntəzəm tibbi müayinələr
Profilaktik müayinələr bir çox xəstəliklərin erkən aşkarlanmasına imkan verir. Uşaqlar pediatr müayinəsindən mütəmadi keçməlidirlər.
Uşaqların sağlamlığına qoyulan hər bir investisiya cəmiyyətin gələcəyinə qoyulan ən dəyərli sərmayədir.
1 İyun münasibətilə bütün uşaqları təbrik edir, onlara sağlam, xoşbəxt və uğurlu gələcək arzulayırıq.
