Gündə 8–10 saat hərəkətsiz oturmaq infarkt riskini artırır

Kardioloq Oksana Sinenkova uzun müddət oturaq vəziyyətdə qalmağın ürək-damar sisteminə mənfi təsirlərindən danışıb.

Aztibb.az Lenta.ru-nun məlumatına istinadən yazır ki, həkimin sözlərinə görə, işi ilə əlaqədar gün ərzində 8–10 saatı hərəkətsiz şəkildə oturaraq keçirən insanların infarkt keçirmə riski gündə ümumilikdə 3–4 saat oturan şəxslərlə müqayisədə 40–50 faiz daha yüksəkdir.

Kardioloq vurğulayıb ki, müntəzəm qısa fasilələr sağlamlığın qorunması baxımından son dərəcə vacibdir.

“Gündəlik oturma müddətinin mütəmadi olaraq 6–8 saatı keçməsi, hətta fasilələr verilsə belə, ürək-damar xəstəlikləri üçün rəsmi risk faktoru hesab olunur”, – deyə həkim bildirib.

O, həmçinin oturaq işlə məşğul olanlar üçün bir sıra praktik tövsiyələr verib. Belə ki, oturarkən dizlər çanaq səviyyəsindən yuxarı olmamalı, ayaqlar isə tam şəkildə yerə söykənməlidir.

Mütəxəssis hər 30–45 dəqiqədən bir 5–10 dəqiqəlik aktiv fasilələr etməyi tövsiyə edir. Bu zaman yüngül dartınma hərəkətləri etmək, həmkarla yazışmaq əvəzinə onun yanına getmək, lift əvəzinə pilləkənlərdən istifadə etmək və telefonla danışarkən yerimək daha faydalıdır.

Kardioloqun sözlərinə görə, ürək-damar sağlamlığını qorumaq üçün gün ərzində 7–10 min addım atmağa çalışmaq da vacibdir. Bu vərdiş qan dövranını yaxşılaşdırır, artıq çəki riskini azaldır və ürək xəstəliklərinin qarşısının alınmasına kömək edir.