Bu gün dünyada Ümumdünya Tütünsüz Günü qeyd edilir. Ümumdünya Səhiyyə Təşkilatının təşəbbüsü ilə təsis olunan bu günün əsas məqsədi tütün istifadəsinin insan sağlamlığına vurduğu zərərlər barədə ictimaiyyəti məlumatlandırmaq və insanları sağlam həyat tərzinə təşviq etməkdir.

Aztibb.az araşadırmalara istinadən xəbər verir ki, tütün istifadəsi dünya üzrə qarşısı alına bilən ölüm və xəstəlik səbəbləri arasında ilk sıralarda yer alır. Mütəxəssislərin fikrincə, siqaret çəkmək ürək-damar xəstəlikləri, ağciyər xərçəngi, insult, xroniki tənəffüs sistemi xəstəlikləri və bir çox digər ciddi sağlamlıq problemlərinin yaranma riskini artırır. Eyni zamanda, passiv siqaret tüstüsünə məruz qalan insanlar da müxtəlif xəstəliklərlə üzləşə bilirlər.

Ümumdünya Tütünsüz Günü münasibətilə dünyanın müxtəlif ölkələrində maarifləndirici tədbirlər, sağlamlıq aksiyaları və kampaniyalar keçirilir. Bu təşəbbüslər vasitəsilə insanlar tütünün zərərləri barədə məlumatlandırılır, siqaretdən imtina etmək istəyənlərə dəstək göstərilir.

Həkimlər bildirirlər ki, siqareti tərgitmək üçün heç vaxt gec deyil. Tütündən imtina etdikdən qısa müddət sonra qan dövranı və tənəffüs sistemi fəaliyyətində müsbət dəyişikliklər başlayır, uzunmüddətli perspektivdə isə ürək-damar və onkoloji xəstəliklərin inkişaf riski əhəmiyyətli dərəcədə azalır.

Mütəxəssislər sağlamlığın qorunması üçün vətəndaşlara tütün məmulatlarından uzaq durmağı, aktiv həyat tərzi sürməyi, balanslaşdırılmış qidalanma prinsiplərinə əməl etməyi və mütəmadi tibbi müayinələrdən keçməyi tövsiyə edirlər.

31 May – Ümumdünya Tütünsüz Günü bir daha xatırladır ki, sağlam gələcəyin əsası zərərli vərdişlərdən imtina və sağlam seçimlərdən başlayır.