Tədris Cərrahiyyyə Klinikasında altı il əvvəl uğursuz sünnət əməliyyatı nəticəsində cinsiyyət üzvünün baş hissəsini itirən uşaq üzərində mürəkkəb rekonstruktiv əməliyyat icra olunub.

Klinikadan Aztibb.az-a verilən xəbərə görə, əməliyyatı klinikanın uşaq cərrahı, dosent Vüqar Məhəmmədov həyata keçirib.

Azərbaycan Tibb Universitetinin (ATU) uşaq cərrahlığı kafedrasının dosenti V. Məhəmmədovun sözlərinə görə, uşaq uzun illər sidik ifrazında ağrı və çətinlikdən əziyyət çəkib. Daha əvvəl aparılan cərrahi müdaxilə isə nəticəsiz qalıb. Müayinələr zamanı cinsiyyət üzvünün baş hissəsinin tam olmadığı müəyyən edilib və rekonstruktiv əməliyyata qərar verilib.

Əməliyyat zamanı uşağın dodağının selikli qişasından götürülən toxuma cinsiyyət üzvünün kavernoz cisimləri üzərinə köçürülüb. Həkim bildirib ki, məhz selikli qişanın elastikliyi, yüksək uyğunlaşma qabiliyyəti və kosmetik baxımdan daha təbii nəticə verməsi bu üsulun seçilməsinə səbəb olub.

Hazırda uşağın sidik ifrazının tam normal olduğu, cinsiyyət üzvündə əyriliyin müşahidə edilmədiyi və gələcəkdə funksional problem gözlənilmədiyi qeyd olunub. Həkim əlavə edib ki, bu tip əməliyyatlarda qreftin “tutmaması” kimi risklər mövcud olsa da, əməliyyat uğurla nəticələnib və əlavə fəsad qeydə alınmayıb.

Vüqar Məhəmmədovun sözlərinə görə, son illərdə bu tip uroloji rekonstruksiyalarda dəri əvəzinə daha çox dodaq və yanağın selikli qişasından istifadə olunur. Bunun əsas səbəbi dəridə tük follikullarının gələcəkdə sidik ifrazı ilə bağlı problemlər yaratma ehtimalıdır.