Naxçıvan Muxtar Respublikası səhiyyə nazirinin müavini, nazir vəzifələrini müvəqqəti icra edən Rəşadət Nabatov tərəfindən Səhiyyə Nazirliyinin inzibati binasında vətəndaş qəbulu keçirilib.

Nazirlikdən Aztibb.az-a bildirilib ki, qəbul zamanı vətəndaşların müraciətləri diqqətlə dinlənilib, onları narahat edən məsələlər araşdırılıb və qaldırılan məsələlərin həlli istiqamətində aidiyyəti üzrə müvafiq tapşırıqlar verilib. Müraciətlər əsasən tibbi xidmətlərin təşkili, müalicə və müayinə məsələləri, işlə təminat və digər sosial yönümlü məsələləri əhatə edib.
Qəbulda ümumilikdə 44 vətəndaş iştirak edib.

Qeyd olunub ki, vətəndaş müraciətlərinin operativ və obyektiv şəkildə araşdırılması, insanların problemlərinin həlli istiqamətində zəruri tədbirlərin görülməsi səhiyyə sahəsində həyata keçirilən fəaliyyətin əsas istiqamətlərindən biridir.

Naxçıvan Muxtar Respublikasında əhalinin sağlamlığının qorunması, tibbi xidmətlərin keyfiyyətinin artırılması və vətəndaş məmnunluğunun təmin olunması istiqamətində tədbirlər bundan sonra da davam etdiriləcək.