"Greenpeace" təşkilatının yeni hesabatında plastik ağızlıqlı paketlərdə satılan bəzi uşaq qidalarında minlərlə mikroplastik hissəcik aşkarlandığı bildirilib.

Aztibb.az "News-medical"a istinadən yazır ki, “Kiçik Plastiklər, Böyük Problem: Uşaq Qidası Paketlərinin Gizli Riskləri” adlı hesabatda mikroplastiklərin bir qisminin birbaşa qablaşdırma materialından qidaya keçdiyi vurğulanır.

Müstəqil tədqiqat qurumu SINTEF Ocean tərəfindən aparılan testlərdə Danonenin “Happy Baby Organics” və Nestlénin “Gerber” markalı məhsullarında hər qramda onlarla mikroplastik hissəcik müəyyən edilib. Araşdırmaya görə, bəzi məhsullarda bir paketdəki ümumi mikroplastik sayı 11 mini ötüb.

Hesabatda qeyd olunur ki, testlər zamanı qidada aşkarlanan bəzi mikroplastiklərin qablaşdırmanın daxili örtüyündə istifadə olunan polietilenlə birbaşa əlaqəsi müəyyən edilib. Bundan əlavə, araşdırmalar plastik qabın cəmi 3 dəqiqə mikrodalğalı sobada qızdırılması zamanı təxminən 4 milyon mikroplastik hissəciyinin qidaya keçə bildiyini göstərir.

Mütəxəssislər vurğulayırlar ki, orqanizmi və daxili orqanları hələ inkişaf mərhələsində olan körpələr plastik hissəciklərə və kimyəvi maddələrə qarşı daha həssasdır. Hesabatda uşaq qidalarının qablaşdırmasından qidaya keçən onlarla kimyəvi maddənin aşkarlandığı, bunların bir qisminin potensial toksik təsir göstərə biləcəyi qeyd olunur. Xüsusilə endokrin sistemi pozan kimyəvi maddələrə erkən yaşlarda məruz qalmanın böyümə, maddələr mübadiləsi və reproduktiv sistem üzərində uzunmüddətli təsirlər yarada biləcəyi bildirilir.

Araşdırmada həmçinin vurğulanır ki, elastik plastik paketlər 2025-ci il etibarilə qlobal uşaq qidası qablaşdırma bazarının 37 faizdən çoxunu təşkil edir və bu göstəricinin yaxın illərdə daha da artacağı gözlənilir.

Berk Butan bildirib ki, plastik qablaşdırmalar son illərdə adi hala çevrilsə də, insan sağlamlığı və ətraf mühit üçün ciddi risklər yaradır. Onun sözlərinə görə, plastiklə təmasda olan məhsulları satışa çıxaran şirkətlər istehlakçıların mikroplastik və zərərli kimyəvi maddələrə məruz qalmadığını müstəqil testlərlə sübut etməlidirlər. Greenpeace həmçinin hökumətləri plastik istehsalını məhdudlaşdıran və sağlamlıq üçün təhlükəli qablaşdırmaları aradan qaldıran hüquqi mexanizmlər qəbul etməyə çağırıb.