Beyin damarlarının anevrizması uzun müddət simptomsuz keçə bilər və damar partladığı halda ani ölümə səbəb ola bilər.

Aztibb.az "Pravda" nəşrinə istinadən yazır ki, bu barədə fikirlərini bölüşən rusiyalı nevroloq Aleksandr Komarovun sözlərinə görə, anevrizma damar divarlarının zəifləməsi və ya nazilməsi nəticəsində arteriyanın patoloji genişlənməsidir. O, beynin müxtəlif damar sahələrində formalaşa bilər və əksər hallarda uzun müddət heç bir əlamət vermir.

Nevroloq qeyd edib ki, anevrizmanın yerləşdiyi nahiyədən asılı olmayaraq, bu vəziyyət olduqca təhlükəlidir. Əgər damar zədələnərsə və ya partlayarsa, ölüm ani şəkildə baş verə bilər.

Həkim vurğulayıb ki, simptomlar əsasən iri ölçülü anevrizmalar zamanı ortaya çıxır. Kiçik damar genişlənmələri isə adətən hiss olunmur və çox vaxt təsadüfən – kontrastlı MRT və ya KT müayinələri zamanı aşkarlanır. Bu müayinələr anevrizma ilə yanaşı digər damar patologiyalarını da müəyyən etməyə imkan verir.

Nevroloqun sözlərinə görə, anevrizmanın dərmanla müalicəsi mümkün deyil və problem yalnız cərrahi müdaxilə ilə aradan qaldırıla bilər. Əməliyyat üsulu hər bir pasiyentin xəstəlik tarixçəsinə uyğun fərdi şəkildə seçilir.

Həkim əlavə edib ki, bu cür əməliyyatların təxminən 90 faizi uğurla nəticələnir və pasiyentlər xəstəlikdən xilas ola bilirlər.