Banqladeşdə qohum nigahı edən cütlüyün anensefaliya diaqnozu ilə dünyaya gələn körpəsi sosial mediada geniş müzakirələrə səbəb olub.

Aztibb.az "The Indian Express" portalının məlumatına istinadən yazır ki, həkim müayinəsi zamanı körpədə kəllə sümüyünün və beynin tam formalaşmadığı müəyyən edilib. Müayinənin görüntüləri sosial şəbəkələrdə yayıldıqdan sonra bu nadir patologiya yenidən diqqət mərkəzinə gəlib.

Tibbdə “anensefaliya” adlandırılan bu vəziyyət dölün ana bətnində inkişafı zamanı sinir borusunun tam bağlanmaması nəticəsində yaranır. Bu ağır inkişaf qüsuru zamanı beynin və kəllənin bir hissəsi formalaşmır.

Mütəxəssislər bildirirlər ki, xəstəliyin yaranmasında genetik faktorlarla yanaşı, fol turşusu çatışmazlığı və qohum nigahları da risk amilləri sırasında yer alır. Həkimlər hamiləlik planlayan qadınlara fol turşusu qəbulunun vacibliyini və prenatal nəzarətin əhəmiyyətini xüsusi vurğulayırlar.