Yeni araşdırma əməliyyatdan sonrakı ağrıların şiddətində D vitamini səviyyəsinin mühüm rol oynaya biləcəyini ortaya çıxarıb.

Aztibb.az "Regional Anesthesia & Pain Medicine" jurnalında dərc olunan tədqiqat nəticələrinə diqqət çəkib.

Elmi araşdırmaya görə, orqanizmdə D vitamini çatışmazlığı olan xəstələr əməliyyatdan sonra daha güclü ağrı hiss edir və daha çox ağrıkəsici dərmanlara ehtiyac duyurlar. Xüsusilə süd vəzi xərçəngi səbəbilə əməliyyat olunan qadınlarda bu fərq daha aydın müşahidə olunub.

184 xəstə üzərində araşdırma aparılıb

Alimlər Fayoum Universitet Xəstəxanası bazasında 184 qadın pasiyentin məlumatlarını analiz ediblər. Pasiyentlərin bir hissəsində D vitamini səviyyəsi normadan aşağı, digər hissəsində isə normal göstəricilərdə olub.

Yaşı təxminən 42–44 arasında olan hər iki qrup əməliyyat öncəsi, əməliyyat zamanı və sonrası dövrdə diqqətlə izlənilib. Həkimlər xəstələrin D vitamini statusundan xəbərsiz şəkildə müşahidələr aparıblar.

Ağrı və dərman istifadəsində fərq

Nəticələr göstərib ki, D vitamini aşağı olan xəstələr əməliyyat zamanı daha çox güclü ağrıkəsiciyə, o cümlədən fentanilə ehtiyac duyublar. Əməliyyatdan sonra isə bu qrup pasiyentlər ağrı nəzarət sistemini daha tez-tez istifadə edərək orta hesabla daha yüksək dozada tramadol qəbul ediblər.

Bundan əlavə, D vitamini çatışmazlığı olan xəstələrdə ürəkbulanma, yuxululuq və bəzi hallarda qusma kimi yan təsirlər daha çox müşahidə olunub.

Tədqiqatçılar hesab edirlər ki, D vitamini orqanizmin ağrını hiss etmə və tənzimləmə mexanizmlərində mühüm rol oynayır. Onun iltihabəleyhinə və immun sisteminə təsiri əməliyyatdan sonrakı sağalma prosesinə birbaşa təsir göstərə bilər.

Mütəxəssislər əməliyyatdan əvvəl D vitamini səviyyəsinin yoxlanılması və lazım gələrsə korreksiya edilməsinin pasiyentlərin postoperativ komfortunu yaxşılaşdıra biləcəyini bildirirlər.