Tədris Cərrahiyyə Klinikasında öd daşı xəstəliyinin nadir və mürəkkəb forması ilə bağlı uğurlu cərrahi əməliyyat icra olunub.

 

Azərbaycan Tibb Universitetinin (ATU) Ümumi cərrahlıq kafedrasının müdiri, professor Elçin Ağayev Aztibb.az-a bildirib ki, xəstə sağ qabırğaaltı ağrılar və ürəkbulanma şikayətləri ilə müraciət edib. Aparılan ultrasəs müayinəsi zamanı öd kisəsinin boynunda Hartman cibində yerləşən 3 santimetrlik daş aşkarlanıb.

 

Müayinələr nəticəsində həmçinin öd kisəsinin təxminən 30 santimetrə qədər böyüdüyü, hidropik dəyişikliklərə uğradığı və mərkəzi hissəsindən qatlandığı müəyyən olunub. Professorun sözlərinə görə, iltihabi və infiltrativ dəyişikliklər səbəbindən qaraciyəraltı nahiyə, onikibarmaq bağırsaq və köndələn çənbər bağırsaq öd kisəsinə yapışmış vəziyyətdə olub ki, bu da əməliyyatı texniki baxımdan olduqca mürəkkəb edib.

 

Elçin Ağayev qeyd edib ki, öd daşı xəstəliyi praktikada ən çox rast gəlinən xəstəliklərdən biri olsa da, 35 santimetrə qədər böyümüş və hidropik dəyişikliklərə uğramış öd kisəsi nadir hallarda müşahidə edilir.