A.Rüstəmova bildirib ki, yaz və yay aylarının gəlişi ilə əlaqədar olaraq uşaqlar arasında mövsümi allergiya (polinoz) hallarına rast gəlinir:

“Havada bitki və ağac tozcuqlarının (polen) çoxalması uşaqların immunitet sistemində kəskin reaksiyalara səbəb olur. Valideynlər çox vaxt allergiyanı adi soyuqdəymə və ya qrip ilə səhv salırlar. Lakin virus infeksiyalarından fərqli olaraq, mövsümi allergiya zamanı uşaqlarda yüksək qızdırma müşahidə olunmur. Əgər asqırma, burun axması, gözlərin sulanması və qaşınması iki həftədən uzun sürürsə, bu artıq allergiyanın əlamətidir”.

 

Həkim-pediatr əlavə edib ki, həkim məsləhəti olmadan apteklərdən alınan kor-koranə burun damcıları və siroplar uşaqların sağlamlığına ciddi ziyan vurur:

“Xüsusilə damardaraldıcı burun damcılarının uzun müddət istifadəsi burunun selikli qişasını zədələyir və asılılıq yaradır. Müalicə mütləq şəkildə həkim nəzarəti altında, uşağın yaşına uyğun aparılmalıdır. Vaxtında müalicə olunmayan və qarşısı alınmayan mövsümi allergiyalar gələcəkdə daha ağır fəsadlara — xroniki sinusitə, orta qulaq iltihabına və ən əsası allergik astmaya çevrilə bilər”