Tədris Cərrahiyyə Klinikasında 40 yaşlı qadın xəstədə sağ böyrəyin böyük ölçülü kistasının laparoskopik yolla ləğvi əməliyyatı icra olunub.

 

Klinikadan Aztibb.az-a verilən xəbərə görə, Azərbaycan Tibb Universitetinin Urologiya kafedrasının müdiri, professor Tədris Cərrahiyyə Klinikasının uroloq-cərrahı, Rauf Nağıyev bildirib ki, xəstə sağ bel nahiyəsində daimi küt ağrılar, arterial təzyiqin dəyişməsi və sağ tərəfdə yata bilməmə şikayətləri ilə müraciət edib. Aparılan müayinələr nəticəsində xəstəyə sağ böyrəyin 7 sm ölçülü kistası diaqnozu qoyulub.

 

Professorun sözlərinə görə, əməliyyat az invaziv üsul olan laparoskopik metodla həyata keçirilib. Müdaxilə zamanı kistanın böyrəyin daxilinə ciddi basqı göstərdiyi, həm qan dövranını, həm də orqanın funksiyasını pozduğu müşahidə olunub.

 

Qeyd edilib ki, böyrək kistaları xüsusilə 45-50 yaşdan sonra geniş yayılır və insanların təxminən yarısında rast gəlinir. Lakin bütün kistalar əməliyyat tələb etmir. Həkimin fikrincə, 4 sm-dən böyük kistalar böyrəyin fəaliyyətinə təsir göstərdiyi üçün onların ləğvi vacib hesab olunur.

 

Professor Rauf Nağıyev həmçinin vurğulayıb ki, böyrək kistaları xoşxassəli törəmələrdir və yaranma səbəbi tam məlum deyil.