Son 33 il ərzində dünyada diaqnoz qoyulmuş psixi pozuntu hallarının sayı demək olar ki, iki dəfə artaraq təxminən 1,2 milyard nəfərə çatıb.

Aztibb.az xəbər verir ki, bu barədə məlumat məşhur "The Lancet" tibb jurnalında dərc olunub.

Hesabatda göstərilir ki, 2023-cü ildə qlobal miqyasda 1,17 milyard psixi pozuntu halı qeydə alınıb ki, bu da hər 100 min nəfərə 14,2 min xəstəlik göstəricisinə bərabərdir. Bu qiymətləndirmələr 1990-cı ildən 2023-cü ilə qədər olan dövrdə diaqnoz qoyulmuş halların 95,5% artması və xəstələnmə tezliyi əmsalının daha 24,2% yüksəlməsi ilə tamamilə üst-üstə düşür.

Alimlərin tədqiqatı 2023-cü il də daxil olmaqla uzun bir dövrü əhatə edir. Araşdırma çərçivəsində dünyanın təxminən 200 ölkəsində 12 fərqli psixi pozuntuya dair müxtəlif məlumatlar analiz edilib.

Müəlliflərin sözlərinə görə, araşdırılan bütün psixi xəstəliklər üzrə artım müşahidə olunub, lakin ən yüksək artım şizofreniya, təşviş (həyəcan) pozuntusu və klinik depressiya kimi xəstəliklərdə qeydə alınıb.