Birləşmiş Krallıq alimlərinin apardığı yeni klinik araşdırma göstərib ki, cəmi bir saat ərzində çirkli havaya məruz qalmaq beyin və tənəffüs sisteminin fəaliyyətində nəzərəçarpacaq dəyişikliklər yarada bilər.

Aztibb.az "Clean Air" jurnalında dərc olunan tədqiqatın nəticələrinə diqqət çəkib.

Hazırda dünyanın bir çox ölkəsində hava keyfiyyəti standartları havadakı hissəciklərin miqdarına əsasən müəyyən edilir. Lakin yeni araşdırma göstərib ki, yalnız hissəciklərin sayı deyil, onların mənbəyi və kimyəvi tərkibi də insan sağlamlığı üçün böyük əhəmiyyət daşıyır.

Tədqiqatın aparıcı müəllifi, Thomas Faerty rəhbərliyi altında alimlər ailəsində demensiya halları olan, yaşı 50-dən yuxarı 15 sağlam könüllünü araşdırmaya cəlb ediblər. İştirakçılar xüsusi qapalı kamerada 60 dəqiqə ərzində müxtəlif növ hava çirkləndiricilərinə məruz qalıblar.

Araşdırma zamanı beş fərqli şərait sınaqdan keçirilib: təmiz hava, odun tüstüsü, dizel mühərriki qazları, mətbəx tullantıları və limonen tərkibli təmizləyici vasitələrin yaratdığı sitrus aerozolu. Hər bir iştirakçı bütün bu mühitlərə ayrı-ayrılıqda məruz qalıb və testlər arasında iki həftə fasilə verilib.

Maraqlıdır ki, bütün hallarda havadakı bərk hissəciklərin konsentrasiyası eyni olub. Bu isə alimlərə müxtəlif çirkləndirici mənbələrin insan orqanizminə təsirini ayrıca qiymətləndirməyə imkan verib.

Tədqiqat nəticəsində müəyyən olunub ki, bəzi çirkləndiricilərdən sonra ağciyər funksiyasında nəzərəçarpacaq azalma müşahidə edilib. Xüsusilə odun tüstüsü və limonen aerozolundan sonra nəfəsvermə göstəriciləri zəifləyib. Dəyişikliklər klinik diaqnoz üçün yetərli olmasa da, alimlər sağlam insanlarda belə qısa müddətli təsirdən sonra ümumiyyətlə dəyişiklik gözləmədiklərini bildiriblər.

Mütəxəssislərin fikrincə, bu nəticələr tənəffüs sistemi və beynin hava çirkliliyinin kimyəvi tərkibinə əvvəl düşünüləndən daha həssas olduğunu göstərir. Araşdırma həmçinin mövcud hava keyfiyyəti standartlarının yenidən nəzərdən keçirilməsinin vacibliyini gündəmə gətirir.