Avropa Xəstəliklərin Qarşısının Alınması və Nəzarət Mərkəzi tərəfindən yayılan məlumatlara əsasən, Avropada cinsi yolla keçən infeksiyaların yayılmasında kəskin artım müşahidə olunur.

Aztibb.az xəbər verir ki, bu barədə "Politico" nəşri yazıb.

Məlumata görə, sifilisə yoluxma halları təxminən 46 minə çatıb ki, bu da 2015-ci illə müqayisədə iki dəfə çoxdur və indiyədək qeydə alınmış ən yüksək göstərici hesab olunur. Eyni zamanda 2024-cü ildə qonoreya (süzənək) hallarının sayı 106 mindən çox olub və bu, əvvəlki ilə nisbətən 4,3% artım deməkdir.

Statistikaya əsasən, sifilis və qonoreya halları üzrə yoluxmaların yarıdan çoxu kişilər arasında, xüsusilə də eyni cinsli cinsi əlaqədə olan şəxslər arasında qeydə alınıb. Mütəxəssislər bu tendensiyanı ictimai səhiyyə baxımından riskli hesab edirlər.

Avropa Xəstəliklərin Qarşısının Alınması və Nəzarət Mərkəzi nümayəndəsi Bruno Chancó bildirib ki, bu infeksiyalar müalicə olunmadıqda ciddi fəsadlara səbəb ola bilər. Onun sözlərinə görə, sifilis ürək-damar sistemi və sinir sistemi pozğunluqları, həmçinin xroniki ağrılar və sonsuzluq kimi ağır nəticələrə gətirib çıxara bilər.

Mütəxəssislər xüsusilə anadangəlmə sifilis hallarının artmasından narahatdırlar. Bildirilir ki, bu göstərici 78-dən 140-a yüksəlib. Eyni zamanda xlamidioz hallarında cüzi azalma müşahidə olunsa da, ümumi yoluxma sayı 213 mindən yuxarı olaraq qalır.

Ekspertlərin fikrincə, gənclər arasında seksual davranış modellərinin dəyişməsi, qorunma tədbirlərinin kifayət qədər tətbiq olunmaması və maarifləndirmə səviyyəsinin zəifləməsi bu artımın əsas səbəblərindən biri kimi göstərilir.