USM hamiləlikdə yalnız görüntü deyil - dölün inkişafını izləyən əsas diaqnostik üsuldur.

Bu barədə Aztibb.az-a məlumat verən ATU-nun Tədris Cərrahiyyə Klinikasının şüa diaqnostikası həkimi Şəfəq Həsənquliyeva bildirib ki, ultrasəs müayinəsi vasitəsilə dölün inkişafı mərhələli şəkildə qiymətləndirilir, mümkün risklər vaxtında aşkarlanır və hamiləliyin gedişatı nəzarətdə saxlanılır.

Mütəxəssis qeyd edib ki, müasir USM cihazları sayəsində körpənin ürək döyüntüləri, boy və çəki göstəriciləri, daxili orqanların formalaşması, plasentanın vəziyyəti, həmçinin amniotik mayenin miqdarı dəqiqliklə müəyyən olunur. Xüsusilə hamiləliyin 12-ci, 20-ci və 32-ci həftələrində aparılan skrininq müayinələri körpənin anatomik inkişafı ilə bağlı mühüm məlumatlar verir.

Ş.Həsənquliyevanın sözlərinə görə, bəzi valideynlər ultrasəs müayinəsini yalnız körpənin cinsiyyətinin müəyyən edilməsi üçün vacib hesab etsələr də, əslində USM daha böyük əhəmiyyət daşıyır: “Ultrasəs müayinəsi dölün inkişaf geriliyi, ürək qüsurları, sinir sistemi problemləri və digər anadangəlmə patologiyaların erkən aşkarlanmasına imkan verir. Bu isə gələcəkdə yarana biləcək risklərin qarşısının vaxtında alınması baxımından olduqca önəmlidir”.

“Biz müayinə zamanı körpənin hərəkətlərini, nəfəsalma aktivliyini, qan dövranını və özünü necə hiss etdiyini də izləyirik. Bəzən ana heç bir narahatlıq hiss etməsə belə, ultrasəs vasitəsilə riskli vəziyyətləri əvvəlcədən müəyyən etmək mümkün olur”.

Sonda mütəxəssis əlavə edib ki, hamiləlik dövründə vaxtında və düzgün aparılan ultrasəs müayinələri həm ananın psixoloji rahatlığına, həm də sağlam doğuşun təmin olunmasına mühüm töhfə verir. Onun fikrincə, erkən diaqnostika bir çox hallarda gələcək ağırlaşmaların qarşısını almaqda əsas rol oynayır.