Tütün istifadəsi təkcə ağciyərlərə deyil, beyin sağlamlığına da ciddi təsir göstərə bilər. Mütəxəssislərin sözlərinə görə, siqaret yaddaş, diqqət, qərarvermə və davranışların idarə olunmasına cavabdeh olan beyin qabığında (korteksdə) nazikləşməyə səbəb ola bilər. Bu vəziyyət zaman keçdikcə unutqanlıq, öyrənmə çətinliyi, diqqət dağınıqlığı və şəxsiyyət dəyişiklikləri kimi problemlərlə özünü göstərə bilər.

Aztibb.az "CNN Türk"ə istinadən yazır ki, tütün istifadəsi yalnız ağciyər sağlamlığını təhdid etmir. Mütəxəssislərə görə, siqaret beynin düşünmə, yaddaş, diqqət, qərarvermə və davranış nəzarəti kimi mühüm funksiyalarını idarə edən korteks nahiyəsində incəlməyə yol aça bilər. Bu isə zamanla unutqanlıq, diqqət pozuntusu, öyrənmə çətinliyi və şəxsiyyət dəyişiklikləri kimi problemlərə səbəb ola bilər.

Nevroloq dosent Görkəm Tutal Gürsoy tütün istifadəsinin beyin sağlamlığına təsirlərindən danışaraq bildirib ki, siqaret beyin damarlarına mənfi təsir göstərir və xüsusilə beyin qabığında nazikləşməyə səbəb ola bilir. Onun sözlərinə görə, bu incəlmə bəzi insanlarda depressiyaya bənzər əlamətlərin yaranmasına da gətirib çıxara bilər.

Bildirilir ki, siqaretdən istifadə müddəti və çəkilən siqaretin miqdarı artdıqca beyində yaranan zədələnmə də dərinləşir. Siqaretin tərkibindəki toksik maddələr beynin əsas funksiyalarını yerinə yetirən neyronlara zərər verir. Bu zədələnmə hüceyrə ölümünə qədər irəliləyə və Alzheimer kimi xəstəliklərin yaranma riskini artıra bilər. Beyin damarlarının zədələnməsi isə insult kimi ciddi nevroloji xəstəliklər üçün zəmin yaradır.