Müasir dünyada cəmiyyətin təməl daşı olan ailə institutunun qorunması və təbliği qlobal xarakter daşıyır. Məhz bu məqsədlə, hər il 15 may tarixi bütün dünyada Beynəlxalq Ailə Günü kimi geniş qeyd olunur. Bu əlamətdar gün Birləşmiş Millətlər Təşkilatının (BMT) Baş Assambleyasının 20 sentyabr 1993-cü il tarixli qətnaməsinə müvafiq olaraq təsis edilib və 1994-cü ildən etibarən beynəlxalq təqvimə daxil edilib.

Aztibb.az xəbər verir ki, Beynəlxalq Ailə Gününün qeyd olunmasında əsas məqsəd – ailə institutunun cəmiyyətin ən müqəddəs, sarsılmaz və birləşdirici dayağı olduğunu bir daha dünya ictimaiyyətinin diqqətinə çatdırmaqdır. Bu gün bəşəriyyəti çoxəsrlik milli və mənəvi ailə dəyərlərini qorumağa, nəsillərarsı bağı gücləndirməyə və ailə üzvlərini bir-birinə qarşı daha qayğıkeş, məsuliyyətli olmağa səsləyir.

Azərbaycanda da ailə dövlətin və cəmiyyətin himayəsindədir. Xalqımızın milli-mənəvi dəyərlər sistemində ailə hər zaman uca tutulmuş, fərdin formalaşmasında, sağlam gələcəyin qurulmasında və vətənpərvərlik ruhunun aşılanmasında ilkin mənbə rolunu oynamışdır. Bu xüsusi gün, həmçinin ailələrin qarşılaşdığı sosial, iqtisadi və demoqrafik problemlərə diqqət çəkmək, onların rifahının yüksəldilməsi istiqamətində həyata keçirilən dövlət siyasətinə dəstək vermək baxımından böyük önəm kəsb edir.