Piylənmə artıq estetik problem kimi deyil, dövrün ən qorxulu epidemiyası kimi qəbul edilir. Prof. Dr. Sebahattin Çelik piylənmənin xərçəngdən diabetə qədər bir çox xəstəliyin əsas səbəbi olduğunu vurğulayıb.

Aztibb.az "CNN Türk"ə istinadən yazır ki, Avropa Piylənmə Günü çərçivəsində danışan Van Təhsil və Araşdırma Xəstəxanasının Ümumi Cərrahiyyə mütəxəssisi Prof. Dr. Sebahattin Çelik, piylənmənin artıq kosmetik problem kimi qiymətləndirilməməli olduğunu bildirib. O, bu xəstəliyin təkcə bioloji deyil, həm də psixoloji və sosioloji aspektləri ilə yanaşılmalı olduğunu qeyd edib. Van Piylənmə Mərkəzinin 7 ildir apardığı fəaliyyət nəticəsində yüzlərlə xəstənin sağlamlığına qovuşduğunu da əlavə edib.

Avropa Piylənmə Günü münasibətilə dünyada  artan artıq çəki problemləri müasir cəmiyyətlərin ən böyük sağlamlıq təhlükələrindən biri kimi qiymətləndirilir. Yalnız fiziki deyil, həm də psixososial təsirləri ilə insanların həyat keyfiyyətini aşağı salan piylənmə qlobal miqyasda pandemiya xarakteri alıb və mütəxəssislər bunun xroniki xəstəlik kimi qəbul edilməsinin vacibliyini bildirirlər.

Prof. Sebahattin Çelik bildirib ki, piylənmə bu gün ciddi bir epidemiyaya çevrilib: “Piylənmə artıq estetik və ya kosmetik problem kimi qəbul edilməməlidir. Hələ də yalnız estetik məqsədlə müalicəyə müraciət edən insanlar var, lakin bu, doğru deyil. Çünki piylənmə xərçəngdən şəkər xəstəliyinə, təzyiqə qədər bir çox xəstəliyin əsas səbəblərindən biridir. Bundan əlavə, piylənmə yalnız bioloji səbəblərlə izah edilə bilən bir vəziyyət deyil; psixoloji və sosial tərəfləri olan, ‘multifaktorial’ xəstəlikdir. Buna görə də bu, tək bir dərman və ya əməliyyatla həll olunacaq problem deyil; psixoloji dəstək və sosial yanaşma da tələb edir. Piylənmə ilə mübarizə çoxşaxəli bir prosesdir.”