500 mindən çox insanın iştirak etdiyi genişmiqyaslı analiz göstərib ki, insan üçün optimal yuxu müddəti sutkada 6-8 saatdır. Bu müddət erkən ölüm və müxtəlif xəstəliklərin yaranma riskini azaldır.

Aztibb.az xəbər verir ki, neyrobioloq Tsyunhao Venin rəhbərliyi ilə aparılan analiz Britaniya Biobankının iştirakçıları üzərində həyata keçirilib, buna görə də onun nəticələri digər əhali qrupları üçün tam keçərli olmaya bilər. Bundan əlavə, səbəb-nəticə əlaqələrini dəqiq müəyyən etmək mümkün deyil: yuxunun müddəti iştirakçıların qocalmasına və sağlamlığına birbaşa təsir edib, yoxsa qocalma və sağlamlıq problemləri onların yuxu rejiminə təsir göstərib?

Ümumilikdə, əldə olunan məlumatlar yuxunun təkcə beyinə deyil, həm də bütün orqanizmə və orqanlardakı proseslərə necə təsir etdiyi barədə aydın təsəvvür yaradır.