ATU-nun Tədris Cərrahiyyə Klinikasında travma nəticəsində burun sınığı alan pasiyent üzərində mürəkkəb rekonstruktiv əməliyyat uğurla icra olunub.

 

Klinikadan Aztibb.az-a verilən məlumata görə, əməliyyat klinikanın Plastik cərrahiyyə şöbəsinin müdiri Adil Cümşüdov tərəfindən həyata keçirilib.

 

Pasiyent travmadan sonra burunda deformasiya, tənəffüs çətinliyi və ağrı şikayətləri ilə klinikaya müraciət edib. Aparılan radioloji və klinik müayinələr nəticəsində burun sümüklərində yerdəyişmiş sınıqlar aşkarlanıb.

 

Cərrahi müdaxilə zamanı sınıq fraqmentləri xüsusi üsullarla anatomik vəziyyətinə qaytarılıb, burun skeleti stabilizasiya olunub və tənəffüs yolunun açıqlığı bərpa edilib. Əməliyyat prosesində həm funksional, həm də estetik nəticənin qorunmasına xüsusi diqqət yetirilib.

 

Uğurlu keçən əməliyyatdan sonra pasiyentin vəziyyətinin qənaətbəxş olduğu, tənəffüs funksiyasının normallaşdığı bildirilib. Hazırda pasiyentin müalicəsi və bərpa prosesi həkim nəzarəti altında davam etdirilir.