Sidik Kisəsi Xərçəngi Maarifləndirmə Ayı çərçivəsində  mütəxəssislər sidikdə görünən ağrısız qanaxmanın sidik kisəsi xərçənginin ilk əlamətlərindən biri ola biləcəyini bildiriblər.

Aztibb.az "CNN Türk"ə istinadən xəbər verir ki, onkoloq Nuri Karadurmuşun bildirdiyinə görə, “bir dəfə oldu keçdi” düşüncəsi təhlükəlidir: “Çay rəngində və ya açıq qırmızı sidik müşahidə edilirsə, bunu mütləq ciddi qəbul etmək və həkimə müraciət etmək lazımdır”.

Mütəxəssisin sözlərinə görə, sidik kisəsi xərçəngi daha çox 65-70 yaş aralığında rast gəlinir. Lakin siqaret istifadəsinin artması xəstəliyin daha gənc yaşlarda da müşahidə olunmasına səbəb olur. O vurğulayıb ki, siqaret bu xərçəng növü üçün ən mühüm risk faktorudur və riski təxminən 3 dəfə artırır.

Həkim bildirib ki, arsenik kimi toksik maddələr, kimya, tekstil və boya sənayesində istifadə olunan maddələr, eləcə də tez-tez təkrarlanan infeksiyalar və sidik daşı problemi də xəstəlik riskini yüksəldən amillər sırasındadır.

Adətən qadınlarda sidik kisəsi xərçəngi kişilərlə müqayisədə daha az görülsə də, gec diaqnoz səbəbindən xəstəlik daha ağır keçə bilir.

Mütəxəssislər erkən diaqnozun və müasir müalicə metodlarının həm həyat müddətini, həm də xəstələrin yaşam keyfiyyətini artırdığını vurğulayıblar.