Pirallahı Tibb Mərkəzi tərəfindən Ümummilli Lider Heydər Əliyevin anadan olmasının 103-cü ildönümünə həsr olunan velomarafon keçirilib.

Pirallahı Tibb Mərkəzindən Aztibb.az-a verilən xəbərə görə, Mərkəzin, Səhiyyə İşçiləri Həmkarlar İttifaqının və Abşeron Milli Qoruğunun birgə təşkilatçılığı ilə baş tutan tədbir Abşeron Milli Qoruğunun Şah Dili ərazisində təşkil olunub.

Velomarafonda iştirak edən tibb işçiləri və qonaqlar velosiped yürüşündə fəallıq nümayiş etdiriblər. Yarışın sonunda iştirakçılar mükafatlandırılıb, daha sonra isə onlar üçün asudə vaxtın səmərəli təşkili məqsədilə istirahət proqramı təşkil olunub.

Qeyd edək ki, bu velomarafon Pirallahı Tibb Mərkəzi tərəfindən artıq 5-ci dəfə keçirilir. Tədbirin əsas məqsədi sağlam həyat tərzinin təbliği, kollektiv ruhunun gücləndirilməsi və əməkdaşlar arasında həmrəyliyin artırılmasıdır.