Şəkərli diabet xəstələrində görmə zəifliyinin əsas səbəblərindən biri göz dibində maye toplanmasıdır. Tibbdə bu hal “diabetik makulyar ödem” adlanır.

Aztibb.az xəbər verir ki, oftalmoloq Benjamin Kərimovun sözlərinə görə, qanda şəkərin səviyyəsinin uzun müddət yüksək qalması gözün torlu qişasında yerləşən kiçik qan damarlarının divarlarını zədələyir. Nəticədə damarların keçiriciliyi artır və damar daxilindəki maye ətraf toxumalara sızmağa başlayır. Bu maye birbaşa kəskin və rəngli görməyə cavabdeh olan mərkəzi nahiyədə - makulada (sarı ləkədə) toplanaraq ödem yaradır.

“O zaman xəstədə dumanlı görmə, xətlərin əyri görünməsi, oxumaqda çətinlik və zaman keçdikcə görmə itiliyinin ciddi azalması müşahidə olunur”, — deyə oftalmoloq vurğulayıb.

Ekspert qeyd edib ki, xəstələrin ən çox yanıldığı məqam xəstəliyin ilkin mərhələsində ağrı və ya nəzərəçarpan şikayətlərin olmamasıdır. Məhz buna görə də şəkərli diabetdən əziyyət çəkən şəxslər görmələrində problem hiss etməsələr belə, mütəmadi olaraq tam oftalmoloji və göz dibi müayinəsindən keçməlidirlər.

Mütəxəssis əlavə edib ki, vaxtında aşkarlanan diabetik makulyar ödem müasir inyeksiya və lazer müalicə protokolları vasitəsilə uğurla idarə oluna bilir.