Azərbaycan Tibb Universitetinin (ATU) Hərbi Tibb Fakültəsində ümummilli lider Heydər Əliyevin anadan olmasının 103-cü ildönümü münasibətilə tədbir keçirilib.

ATU-dan Aztibb.az-a verilən məlumata görə, əvvəlcə zabit heyəti Ulu Öndərin büstünü ziyarət edərək önünə gül dəstələri qoyub, əziz xatirəsini ehtiramla yad edib.

Tədbidə çıxış edən fakültə rəisi, tibb xidməti polkovniki Məharət Rzayev Ümummilli Liderin dövlətçiliyin inkişafı, Azərbaycan Ordusunun formalaşdırılması və milli dəyərlərin qorunmasında göstərdiyi tarixi xidmətlərdən danışıb. O bildirib ki, Heydər Əliyevin zəngin dövlətçilik irsi bu gün də Azərbaycan xalqı və gəncliyi üçün örnəkdir.

Fakültə rəisinin tədris işləri üzrə müavini – şöbə rəisi, tibb xidməti polkovniki Vüsal Rüstəmzadə də çıxışında Ulu Öndərin təhsil və gənclər siyasətinə verdiyi önəmdən, xüsusilə hərbi təhsil sahəsində həyata keçirilən uğurlu islahatlardan bəhs edib.

Kursantlar adından çıxış edən Gözəlov Əkrəm isə Heydər Əliyevin gənclər siyasəti barədə ətraflı məlumat verib.

“Xalqın Adamı” adlı sənədli filmin nümayişi ilə davam edən tədbirdə Ümummilli Liderin həyat və fəaliyyəti bir daha iştirakçıların diqqətinə çatdırılıb.