6 may 2026-cı il tarixində Respublika Təcili və Təxirəsalınmaz Tibbi Yardım Mərkəzinin Suraxanı rayon Təcili Tibbi Yardım bölməsinin həkimi Ruslan Bağıyev tərəfindən həkim və feldşerlər üçün “Onurğa və ətrafların travmaları zamanı immobilizasiya qaydaları” mövzusunda təlim keçirilib.

 

Respublika Təcili və Təxirəsalınmaz Tibbi Yardım Mərkəzindən Aztibb.az-a bildirilib ki, təlimdə 13 həkim və 14 feldşer iştirak edib.

 

Təlim zamanı iştirakçılara travma hallarında düzgün immobilizasiya üsulları, şinalardan istifadə qaydaları, həmçinin xərək vasitəsilə zərərçəkmişin təhlükəsiz daşınması prinsipləri nəzəri və praktik şəkildə izah edilib. Praktik hissədə müxtəlif ssenarilər üzərində məşqlər aparılaraq real vəziyyətlərdə düzgün yanaşma bacarıqları möhkəmləndirilib.

 

Təlim interaktiv formatda keçirilib və real vəziyyətlərə uyğun ssenarilər üzərində praktiki bacarıqların təkmilləşdirilməsinə xüsusi önəm verilib. İştirakçılar əldə etdikləri bilik və bacarıqların gündəlik fəaliyyətlərində tətbiqinin vacibliyini vurğulayıb.

 

Bu kimi təlim proqramlarının mütəmadi keçirilməsi təcili tibbi yardım xidmətinin keyfiyyətinin artırılmasına, səhiyyə işçilərinin peşəkar hazırlığının gücləndirilməsinə və vətəndaşlara göstərilən tibbi xidmətin daha da təkmilləşdirilməsinə xidmət edir.