Tibbi Ərazi Bölmələrini İdarəetmə Birliyi (TƏBİB) tibb müəssisələrində əhaliyə göstərilən xidmətlərin keyfiyyətinin artırılması istiqamətində tədbirlər həyata keçirir.

TƏBİB-dən Aztibb.az-a verilən məlumata görə, bu çərçivədə Ağstafa Rayon Mərkəzi Xəstəxanasının Təcili tibbi yardım şöbəsi əsaslı təmir olunaraq yenidən istifadəyə verilib.

Əsaslı təmirdən sonra təşkil olunan açılış mərasimində TƏBİB-in Təlim və tədqiqatlar departamentinin rəhbəri Teymur Mirzəbəyli, Ağstafa Rayon Mərkəzi Xəstəxanasının direktoru Səyyad Yusifov, Ağstafa Rayon İcra Hakimiyyətinin başçısının birinci müavini Müşfiq Hüseynov, xəstəxana əməkdaşları, şəhid ailələri və ictimaiyyət nümayəndələri iştirak ediblər.

Təcili tibbi yardım şöbəsinin fəaliyyəti barədə məlumat verən Ağstafa Rayon Mərkəzi Xəstəxanasının direktoru Səyyad Yusifov bildirilib ki, əsaslı təmir işlərinə 2025-ci ilin avqust ayında başlanılıb və şöbənin strukturunun təkmilləşdirilməsi, müasir tələblərə uyğunlaşdırılması istiqamətində işlər görülüb.

Təmir zamanı xəstələrin vəziyyətlərinin ağırlıq dərəcələrinə görə ayrılması üçün triaj sahəsi yaradılıb. Sürətli, effektiv və keyfiyyətli tibbi yardımın göstərilməsinin təmin edilməsi üçün qırmızı, sarı və yaşıl sahələr ayrılıb.

Bunlardan əlavə, pediatrik yardım, kiçik cərrahi əməliyyat və müdaxilə, o cümlədən təcili doğum otaqları yaradılıb.

Təmir zamanı şöbəyə mərkəzləşdirilmiş oksigen sistemi quraşdırılıb və binadan kənarda stansiya yaradılıb. Eyni zamanda, şöbənin elektrik və istilik sistemləri də yenidən qurulub. Şöbə yeni tibbi avadanlıqlarla təchiz edilib.