Səhiyyə Nazirliyi İctimai Səhiyyə və İslahatlar Mərkəzi (İSİM) tərəfindən Bakı şəhəri üzrə T.İsmayılov adına 6 saylı məktəb-lisey, 14, 20, 49, 102, 136, 199, 202 və 212 nömrəli məktəblərdə şagirdlər üçün “Gigiyena qaydaları” mövzusunda maarifləndirici tədbirlər təşkil olunub.

 

Aztibb.az-a İSİM-dən verilən xəbərə görə, Təhsil Nazirliyinin dəstəyi ilə keçirilən tədbirlərdə şagirdlərə sağlamlığın qorunması ilə bağlı ətraflı məlumat verilib.

 

İSİM-in Təlim resurs şöbəsinin meneceri Türkan Məmmədova və Monitorinq və təhlil şöbəsinin meneceri Nigar Abdullayeva geniş təqdimatla çıxış ediblər.

 

Şagirdlərə gigiyena qaydalarına riayət etməyin vacibliyi izah olunub. Şəxsi təmizliyin yoluxucu xəstəliklərdən qorunmaqdakı əsas rolu vurğulanıb, əllərin düzgün yuyulma qaydaları əyani şəkildə nümayiş etdirilib. Həmçinin şagirdlərə gündəlik rejimdə təmizliyə riayət etməyin təkcə sağlamlıq deyil, həm də yüksək əhval-ruhiyyə üçün zəruri olduğu bildirilib.

 

Yekunda iştirakçıları maraqlandıran suallar cavablandırılıb və onlara İSİM tərəfindən hazırlanaraq çap edilən maarifləndirici materiallar təqdim olunub.