ATU-nun II Müalicə-profilaktika fakültəsi Tələbə Elmi Cəmiyyətinin (TEC) ənənəvi konfransı keçirilib.

Universitetdən Aztibb.az-a bildirilib ki, tədbirin əvvəlində Dövlət Himni səsləndirilib və şəhidlərimizin əziz xatirəsi yad edilib.

Konfransın sədri, fakültənin dekanı, dosent İsrail Məhərrəmbəyli son illərdə tələbələrin elmi fəaliyyətə marağının xeyli artdığını diqqətə çatdırıb. Bildirib ki, əvvəllər 60-70 elmi iş təqdim olunurdusa, bu il artıq 280 iş çap edilib. İ.Məhərrəmbəyli ən yüksək nəticə göstərən tələbələrin universitet səviyyəsində keçiriləcək yekun konfransda iştirak hüququ qazanacaqlarını da qeyd edib.

Elmi işlər üzrə prorektor, professor Məlahət Sultan istedadlı tələbələrin elmi fəaliyyətə cəlb olunmasının vacibliyini vurğulayıb. Prorektor tədrisin aparılması və elmi yeniliklərin praktik təcrübəyə tətbiqinin bilavasitə elmi fəaliyyətlə bağlı oldunu vurğulayıb. Nəzəri və klinik kafedralarda çalışan müəllimlərin tədqiqatçı tələbələrə hər zaman dəstək göstərməsini yüksək qiymətləndirən prorektor, konfransın işinə uğurlar arzulayıb.

Tərbiyə işləri üzrə prorektor, dosent Mahir Səfərov hər bir tələbənin gələcəkdə həkim kimi formalaşmasında elmi fəaliyyətin böyük rolundan danışaraq, bu gün elmi işlərini sınağa çıxaran tələbələrin öz zəhmətlərinin bəhrəsini görəcəklərinə əminliyini bildirib.

ATU TEC-in elmi rəhbəri, dosent Nərgiz Məmmədova Tələbə Elmi Cəmiyyətin fəaliyyətinin təhsil prosesinin ayrılmaz hissəsi olduğunu bildirib. Qeyd edib ki, belə konfranslar tələbələrdə tədqiqat vərdişlərinin formalaşmasına və onların gələcək peşəkar inkişafına mühüm töhfə verir, həmçinin tələbələrin elmi yaradıcılığa cəlb olunması ilə ölkədə tibb elminin inkişafına xidmət edir.

II MPF TEC-in elmi rəhbər əvəzi, baş müəllim Günay Eminova elmi işləri qəbul edilən, konfransın materiallarında dərc olunan tələbələri hansı yeri qazanacaqlarından asılı olmayaraq qalib hesab etdiyini vurğulayıb.

ATU TEC-in sədri Nigar Babayeva və II MPF TEC-in sədri Leyla Səfərli konfransın reqlamenti, proqramı və münsiflər heyətinin tərkibi haqda məlumat veriblər. Eyni zamanda münsiflər heyətinin qiymətləndirməsi əsasında qaliblərə diplom və sertifikatların təqdim olunacağı diqqətə çatdırılıb.

Açılış mərasimindən sonra konfrans öz işini panellər üzrə davam etdirib. Konfrans çərçivəsində 100-dən çox məruzə dinlənilib.