Pirallahı Tibb Mərkəzinə 58 yaşlı (kişi cinsli) şəxs qarının ön divarında və hər iki qasıq nahiyəsində olan ağrılar, eləcə də böyük ölçülü şişkinlik şikayətləri ilə müraciət edib. Müayinə zamanı pasiyentə qarının ön divarının ventral yırtığı (keçməzliklə, lakin qanqrenasız) və iki tərəfli qasıq yırtığı diaqnozu qoyulub.

 

Aztibb.az-a Mərkəzdən verilən xəbərə görə, xəstə dərhal cərrahi müdaxiləyə cəlb olunub. Əməliyyat zamanı qarının ön divarındakı ventral yırtıq alloplastik tor vasitəsilə bərpa edilib. Hər iki qasıq yırtığı isə Lichtenstein (Lixşteyn) üsulu ilə, yenə alloplastik tor tətbiq olunmaqla aradan qaldırılıb.

 

Cərrahi müdaxilə Pirallahı Tibb Mərkəzinin Cərrahiyyə şöbəsinin yeni kollektivi həkim-ümumi cərrahları — operativ müdaxiləni icra edən Qabil Kərimov və assistent Şükür Abdullayevin, habelə həkim-anestezioloq-reanimatoloq Sahil Rzayevin və digər tibbi heyətin iştirakı ilə uğurla başa çatdırılıb.

 

Əməliyyatdan sonra xəstənin vəziyyəti stabil və kafi olaraq qiymətləndirilir, hazırda onun müalicəsi davam etdirilir.