Hepatitlə Mübarizə Həftəsi münasibətilə Culfa Rayon Mərkəzi Xəstəxanasında maarifləndirici tədbir təşkil olunub.
Bu barədə Aztibb.az-a Naxçıvan MR Səhiyyə Nazirliyindən xəbər verilib.
Tədbirin məqsədi hepatit virusları haqqında ictimaiyyətin məlumatlandırılması, xəstəliyin qarşısının alınması yolları barədə əhalinin maarifləndirilməsi və profilaktik tədbirlərin gücləndirilməsidir.
Tədbiri giriş sözü ilə Culfa Regional Tibb Mərkəzinin direktoru Zaur Həsənov açaraq hepatit viruslarının cəmiyyət üçün yaratdığı təhlükələr və bu istiqamətdə görülən tədbirlər barədə geniş məlumat verib. O, bildirib ki, vaxtında aparılan diaqnostika və profilaktik tədbirlər hepatitə qarşı mübarizədə mühüm rol oynayır.
Tədbirdə Naxçıvan Muxtar Respublikası QİÇS-lə Mübarizə Mərkəzinin direktoru Leyla Əsgərova və Naxçıvan Muxtar Respublikası Yoluxucu Xəstəliklər Mərkəzinin infeksionisti Abbas Əliyev çıxış edərək hepatit viruslarının növləri, ötürülmə yolları, risk faktorları, diaqnostikası və müalicə metodları barədə ətraflı məlumat veriblər. Çıxışlar zamanı vətəndaşların sualları cavablandırılıb və onlara maarifləndirici bukletlər təqdim olunub.
