Naxçıvan Muxtar Respublikası Səhiyyə Nazirliyində nazirliyin tabeliyində fəaliyyət göstərən tibb müəssisələrində çalışan kadrlar üzrə məsul şəxslərlə iclas keçirilib.

Nazirlikdən Aztibb.az-a bildirilib ki, iclasın keçirilməsində əsas məqsəd səhiyyə sahəsində kadr potensialının gücləndirilməsi, insan resurslarının düzgün idarə olunması, idarəetmə proseslərinin səmərəliliyinin artırılması, eləcə də vahid səhiyyə informasiya sisteminin formalaşdırılması istiqamətində görülən işlərin müzakirəsi olub.

Tədbirdə Səhiyyə Nazirliyinin İnzibati İdarəetmə Şöbəsinin kadrlarla iş üzrə baş məsləhətçisi Ayşən Səfərova mövzu ilə bağlı çıxış edərək səhiyyə sistemində kadr siyasətinin düzgün qurulmasının əhəmiyyətindən bəhs edib. O, kadrların seçilməsi, yerləşdirilməsi, peşəkar inkişafının təmin olunması və idarəetmədə müasir yanaşmaların tətbiqi barədə iştirakçılara geniş məlumat verib.

İclas zamanı həmçinin səhiyyə müəssisələrində insan resurslarının vahid bazada toplanması, bu istiqamətdə elektron sistemlərin tətbiqi və vahid informasiya mühitinin yaradılması ilə bağlı müzakirələr aparılıb. Ayşən Səfərova qeyd olunan məsələlər ətrafında iştirakçıların suallarını cavablandırıb, təklif və tövsiyələri dinləyib.