TƏBİB-in təşkilatçılığı, Qazax Rayon İcra Hakimiyyəti və Qazax Rayon Mərkəzi Xəstəxanasının dəstəyi ilə "Qlobal Cərrahiyə 2030" proqramı çərçivəsində Qazax rayonunda “Kəskin qarın hallarının idarə olunmasında komanda yanaşması: Triajdan çevik müdaxiləyə” mövzusunda seminar keçirilib.

 

Bu barədə Aztibb.az TƏBİB-ə istinadla xəbər verir.

 

Bildirilib ki, Şəmkir-Tovuz tibbi ərazi bölməsi (TƏB) üzrə fəaliyyət göstərən ailə həkimləri, cərrahlar, terapevtlər və təcili yardım tibb bacıları üçün keçirilən seminarın məqsədi müxtəlif ixtisas sahibləri arasında multidisiplinar əməkdaşlığı gücləndirmək, “kəskin qarın” hallarının vaxtında və düzgün diaqnostikasını, optimal yönləndirilməsini və uyğun tibbi müdaxilələrin həyata keçirilməsini təmin edən vahid idarəetmə sisteminin formalaşdırılmasıdır.

 

Seminarda TƏBİB-in İcraçı direktorunun müşaviri, Almaniyanın Haydelberq Universitetinin Manhaym Tibb fakültəsinin Cərrahiyyə klinikasının həkimi, Cərrahiyyə Mərkəzində bölmə müdirinin müavini, cərrah-onkoloq, t.ü.f.d, dosent Vüqar Yaqublu, Qazax Rayon İcra Hakimiyyətinin başçısı Rəcəb Babaşov və icra aparatının məsul əməkdaşları, TƏBİB-in Təlim və tədqiqatlar Departamentinin Tibb müəssisələrində təlimlərin idarəolunması şöbəsinin müdiri t.e.d. Emil İskəndərov, Qazax Rayon Mərkəzi Xəstəxanasının direktoru Afiq Fərruxov, Şəmkir Rayon Mərkəzi Xəstəxanasının direktoru Samir Namazov, Tovuz Rayon Mərkəzi Xəstəxanasının Cərrahi işlər üzrə direktor müavini Faiq Vəliyev, Qazax, Ağstafa, Tovuz, Şəmkir, Gədəbəy rayonlarında çalışan yerli tibb müəssisələrinin əməkdaşları, Təcili tibbi yardım xidmətlərinin nümayəndələri və cərrahi sahədə çalışan 61 tibb işçisi tədbirdə iştirak ediblər.

 

Seminarın rəsmi açılışından sonra Şəmkir Rayon Mərkəzi Xəstəxanasının direktoru Samir Namazov “Kəskin qarın hallarında komanda işi niyə önəmlidir?”, Tovuz Rayon Mərkəzi Xəstəxanasının Cərrahi işlər üzrə direktor müavini Faiq Vəliyev "Kəskin qarın hallarında sahə həkimi ilə fəaliyyətin idarə edilməsi”, Qazax Rayon Mərkəzi Xəstəxanasının Təcili yardım bölməsinin müdiri Nəzrin Əliyeva “Rayon xəstəxanasında kəskin qarın halları, Qazax Rayon Mərkəzi Xəstəxanasının Cərrahiyyə şöbəsinin müdiri Vasif Məmmədov “Kəskin qarın: cərrahi xəstəliklərin idarə olunması, Azərbaycan Kardiologiya Cəmiyyətinin üzvü Xatirə Abduləlimova “Kəskin qarın klinikasını təqlid edən kardiorespirator xəstəliklər”, həkim-terapevt Gülsüm Babayeva “Digər qeyri-cərrahi səbəblər və idarəetmə üsulları” mövzularında çıxış ediblər.

 

Qeyd edək ki, “Qlobal Cərrahiyyə 2030” proqramı regionlarda zəruri, təhlükəsiz və əlverişli cərrahiyyə və anesteziya xidmətlərinin mövcud vəziyyətini təhlil etmək və bu xidmətlərin inkişafı üçün gərəkli olan strategiyanı müəyyən etmək üçün yaradılıb.