Ağdaş Rayon Mərkəzi Xəstəxanasının müxtəlif ixtisaslı həkim-mütəxəssislərindən ibarət səyyar tibbi briqadası tərəfindən Ləki qəsəbə Ailə Sağlamlıq Mərkəzində növbəti tibbi müayinələr həyata keçirilib.

Aztibb.az-a Xəstəxanadan bildirilib ki, müayinələrə 9 uşaq və 48 böyük olmaqla, ümumilikdə 57 nəfər cəlb olunub. Tibbi baxış zamanı ümumilikdə 109 adda xidmət göstərilib.

Bu cür səyyar tibbi aksiyaların əsas məqsədi kənd və qəsəbələrdə yaşayan vətəndaşların keyfiyyətli tibbi xidmətlərə daha rahat çıxışını təmin etməkdir. Eyni zamanda, bu tədbirlər çərçivəsində peyvənd olunmamış uşaqların aşkar edilərək vaksinasiya olunması, qeydiyyatsız hamilələrin müəyyənləşdirilməsi, hamilə və yeni doğulmuş körpələrə patronaj xidmətinin göstərilməsi, əhalinin peyvəndlər haqqında məlumatlandırılması və ehtiyac olduqda laborator-instrumental müayinələrin yerində aparılması həyata keçirilir.