Bəzi insanlar siqareti tərgitmək üçün çıxış yolunu veyplərdə (elektron siqaret) görürlər. Bu isə bir növ "yağışdan çıxıb, yağmura düşmək" anlamına gəlir. Çünki bu cihazların insan orqanizminə vurduğu zərərlərin sayı günü-gündən artır.

Aztibb.az xəbər verir ki, bu yaxınlarda Kaliforniya Universitetinin alimləri onların daha bir neçə zərərini ortaya çıxarıblar.

"ACS Central Science" (ACS CS) elmi jurnalında dərc olunan araşdırmanın nəticələri göstərib ki, birgünlük istifadə zamanı bəzi veyplər 20 qutu adi siqaretdə olandan daha çox qurğuşun buraxa bilər. Bundan əlavə, buxarlarda kanserogen nikel və sürmə də aşkar edilib ki, onların konsentrasiyası hər yeni üfürmə ilə artır. Yeddi məşhur veyp modeli üzərində aparılan testlərdən sonra tədqiqatçılar zəhərli metalların mayeyə həm cihazın komponentlərindən, həm də qızdırıcı batareyalardan daxil olduğunu aşkar ediblər. Yoxlanılan cihazlardan üçündə nikel səviyyəsi kanserogen, dördündə isə neyrotoksiklik həddini keçib. Bu cür veyplərin müntəzəm istifadəsi xərçəng yaradır, sinir sisteminə zərər verir və tənəffüs xəstəliklərinin inkişaf riskini əhəmiyyətli dərəcədə artırır. Eyni zamanda, dünyanın bir çox ölkələrində qadağalara baxmayaraq, istehlakçılar bu məhsulları asanlıqla əldə edə bilirlər.