Azərbaycan Respublikasının Əməkdar həkimi, tibb elmləri doktoru, professor Nəsibə Ağa İsmayıl qızı Hüseynova vəfat edib.

Aztibb.az xəbər verir ki, o, 99 yaşında dünyasını dəyişib.

Nəsibə Hüseynova 25 yanvar 1926-cı ildə Bakı şəhərində anadan olmuşdu. 1943-cü ildə Azərbaycan Dövlət Tibb Universitetinə qəbul olmuş, 1948-ci ildə Moskva şəhərinin N. İ. Piroqov adına Tibb İnstitutunu bitirmişdi.

O, 1948-ci ildə Azərbaycan Dövlət Tibb İnstitutunun Uşaq xəstəliklərinin propedevtikası kafedrasının kliniki ordinatoru vəzifəsini icra etmişdi. Daha sonra 1950–1951-ci illərdə Laçın şəhərindəki qadın və uşaq məsləhətxanasının müdiri vəzifəsində çalışmışdı. 1955–1959-cu illərdə Ana və Uşaqların Mühafizəsi Elmi-Tədqiqat İnstitutunda əvvəlcə baş elmi işçi, sonra şöbə müdiri kimi fəaliyyət göstərmişdi.

Nəsibə Hüseynova 1959-cu ildən ATU-nin Hospital pediatriya kafedrasının dosenti, 1970-ci ildən isə həmin kafedranın professoru olub.

1959–1961-ci illərdə İraqa ezam olunmuş və orada müharibə şəraitində səhiyyə müşaviri işləmişdi. 1970–1992-ci illərdə ATU-nin Müalicə-profilaktika fakültəsinin Uşaq xəstəlikləri kafedrasının müdiri olmuş, 1992-2022-ci illərdə həmin kafedranın professoru vəzifəsində çalışmışdl.

O, 1971–1976-cı illərdə Bakı şəhərində baş pediator vəzifəsini icra etmiş, 1970–1991-ci illərdə Səhiyyə Nazirliyinin IV Baş İdarəsinin baş pediatoru olmuşdu. 1976-2022-ci illərdə Azərbaycan Respublikası Səhiyyə Nazirliyinin baş uşaq qastroenteroloqudur olmuşdu.

Professor Nəsibə Hüseynova 1982-ci ildə 17 saylı uşaq şəhər poliklinikasının bazasında Respublika Uşaq Qastroenteroloji Mərkəzinin yaradıcısı olmuş və uzun illər bu mərkəzdə elmi rəhbər kimi işləyərək, Azərbaycanın bütün regionlarından mədə-bağırsaq problemli uşaqlara yardım etmişdi.

Həkim əsasən uşaqların qidalanması problemlərinə dair tədqiqatlar aparmış, 300-dən artıq elmi məqalənin və metodiki tövsiyələrin müəllifi olmuşdur. Elmi rəhbər kimi 6 tibb elmləri namizədi hazırlayan Nəsibə Hüseynova 2013-cü ildə "Uşaq qastroenterologiya" dərsliyini, 2014-cü ildə isə "Pediatriyada dietoterapiya" dərs vəsaitini çap etdirmişdi.

O, 1951–1954-cü illərdə SSRİ Tibb Elmləri Akademiyasının Pediatriya İnstitutunda namizədlik, 1969-cu ildə isə doktorluq dissertasiyalarını uğurla müdafiə etmişdi.

Nəsibə Hüseynova Azərbaycan Pediatrlar Assosiasiyasının sədri və Türkdilli Ölkələrin Pediatrlar Cəmiyyətinin ilk prezidenti idi.

Əməkdar həkim Nəsibə Hüseynovanın yas mərasimi iyunun 29-u saat 14:00-da Təzə Pir məscidində olacaq.