ABŞ xəstəxanalarında işə başlamazdan bir həftə əvvəl xaricdən gələn yüzlərlə həkim hələ də bu ölkədə müvəqqəti yaşayış hüququ verən viza probleminin həllini gözləyir.
Aztibb.az xarici mediaya istinadla xəbər verir ki, onların bir çoxu mayın sonundan, Dövlət Departamentinin insanların mübadilə proqramları ilə ABŞ-a gəlməsinə imkan verən J-1 vizalarına müraciətləri dayandırdığı vaxtdan bəri qeyri-müəyyən vəziyyətdə qalıb. “NBC News” xəbər verir ki, vizalar əcnəbi həkimlərin tibb fakültəsinin məzunlarına xüsusi ixtisas üzrə təhsil verən ABŞ rezidenturasında iştirak etmək üçün ən geniş yayılmış üsuldur.
Keçən həftə ABŞ Dövlət Departamenti səfirliklərin və konsulluqların viza müsahibələrini bərpa edə biləcəyini, lakin müraciət edənlərin sosial media hesablarını ictimailəşdirməli olduqlarını elan edib.
Beynəlxalq tibb tələbələri və məzunları üçün dəstək və şəbəkə quran “Project IMG” qrupuna görə, həkimlərin bir çoxu hələ də viza təyinatını ala bilməyib, çünki səfirlikləri boş yer açmayıb. Bəzilərinə son bir neçə gün ərzində viza təyinatları ilə bağlı bildirilib ki, onların müraciətləri əlavə nəzərdən keçirilməlidir. Digərlərinə isə vizalar verilməyib, çünki onlar əslən Tramp administrasiyasının son səyahət qadağasında qeyd olunan ölkələrin vətəndaşlarıdır. Bu ay administrasiya yeddi ölkədən olan insanların vizasını qismən məhdudlaşdırıb və daha 12 ölkə üçün viza verilməsini tamamilə dayandırıb.
Milli Rezident Uyğunlaşdırma Proqramına əsasən, bu il ABŞ-dan kənarda olan 6600-dən çox həkim rezidentura proqramlarına qəbul edilib. Bu həkimlərin rezidentlikləri iyulun 1-də başlayır və onların viza almaq üçün təxminən üç ay vaxtı olub. “Project IMG” bildirir ki, beynəlxalq həkimlərin əksəriyyəti Tramp administrasiyasının viza fasiləsindən əvvəl müsahibələr təyin edə və viza ala bilib. Lakin digərləri hələ də ərizələrini yekunlaşdırmaq üçün öz hökumətlərindən sənədləri gözləyirlər və ya iyun ayına qədər müsahibə ala bilməyiblər. Project IMG çərşənbə axşamı bildirib ki, yüzlərlə həkim Tramp administrasiyasının viza məhdudiyyətləri səbəbindən hələ də qeyr-müəyyən vəziyyətdə qalıb.
