Özbəkistanın müxtəlif tanınmış tibb müəssisələrini təmsil edən cərrah həkimlərdən ibarət 10 nəfərlik nümayəndə heyəti Mərkəzi Gömrük Hospitalında ustad dərslərində iştirak ediblər. İlk öncə Özbəkistanın nümayəndə heyəti ilə Mərkəzi Gömrük Hospitalında görüş keçirilib.

Bu barədə Aztibb.az-a Hospitaldan xəbər verilib.

Tədbirdə Mərkəzi Gömrük Hospitalının rəisi - Baş həkimi, t.e.d. Dr.Bəxtiyar Musayev, rəis müavini Nabil Seyidov, Ümumi Cərrahiyyə şöbəsinin ümumi cərrahı, t.e.d. Dr.Aynur Səfiyeva, Özbəkistanın Ürgənc şəhərində yerləşən Daşkənd Tibb Akademiyasının filialının Ümumi Cərrahiyyə kafedrasının müdiri Sanaev Dilşad Aminoviç, Daşkənd şəhərində yerləşən 1 nömrəli Respublika Klinik Xəstəxanasının proktoloq həkimi Şermatov Abdusand və Özbəkistandan gəlmiş digər rəsmi qonaqlar iştirak ediblər.

Tədbirdə Baş həkim Dr. Bəxtiyar Musayev Mərkəzi Gömrük Hospitalının fəaliyyət istiqamətləri, tibb sahəsində tətbiq edilən innovativ texnologiyalar, beynəlxalq əməkdaşlıq layihələri və uğurla həyata keçirilən tibbi xidmətlər barədə, eləcə də 2025-ci ilin fevral ayında Azərbaycanda ilk dəfə meyit donordan canlıya köçürülmüş qaraciyər transplantasiyası əməliyyatı barədə ətraflı məlumat verib.

Bəxtiyar Musayev çıxışında qeyd edib ki, Mərkəzi Gömrük Hospitalında kardiologiya, invaziv kardiologiya, ümumi və laparoskopik cərrahiyyə, urologiya, travmatologiya, ginekologiya, radiologiya, pediatriya və bir çox ixtisaslaşdırılmış sahələr üzrə yüksək səviyyədə tibbi xidmətlər həyata keçirilir, eyni zamanda, dünyanın müxtəlif ölkələrindən olan qabaqcıl tibb müəssisələri və universitetləri ilə sıx əməkdaşlıq edir.

Daha sonra özbəkistanlı cərrahlar Dr. Aynur Səfiyeva tərəfindən icra olunan bir neçə cərrahi əməliyyatı birbaşa izləyib, müasir texnologiyaların tətbiqi ilə həyata keçirilən müdaxilələr barədə ətraflı məlumat əldə ediblər. Dr. Aynur Səfiyeva tərəfindən aparılan əməliyyatlar zamanı istifadə edilən müasir metodlar, pasiyentə yanaşma prinsipləri nümayəndələrin xüsusi marağına səbəb olub.

Səfər çərçivəsində keçirilən bu praktiki və nəzəri təlimlər Azərbaycan-Özbəkistan tibb ictimaiyyəti arasında elmi əməkdaşlığın möhkəmlənməsinə və təcrübə paylaşımına töhfə verməklə yanaşı, gələcəkdə birgə layihələrin reallaşdırılması üçün də zəmin yaradıb.