Sumqayıt Tibb Mərkəzində (STM) “Endometriozun terapiyasında müasir yanaşmalar” mövzusunda elmi-praktik seminar keçirilib.

STM-dən Aztibb.az-a bildirilib ki, tədbirdə Sumqayıt Tibb Mərkəzinin direktor müavini, İlkin səhiyyə xidmətinin rəhbəri Namirə Abbasova da iştirak edib. O, açılış nitqi ilə çıxış edərək seminarın təşkilinin vacibliyini vurğulayıb, bu cür tədbirlərin həkimlərin peşəkar bilik və bacarıqlarının artırılmasında mühüm rol oynadığını qeyd edib. Direktor müavini bildirib ki, qadın sağlamlığına dair maarifləndirici və elmi tədbirlərin mütəmadi keçirilməsi göstərilən tibbi xidmətin keyfiyyətinin artırılmasına xidmət edir.

STM-nin tabeliyində fəaliyyət göstərən tibb müəssisələrində çalışan ginekoloqların iştirak etdiyi seminarda bu sahədə aktual olan problemlər, diaqnostika və müalicə metodları müzakirə olunub.

Elmi-Təddqiqat Mamalıq və Ginekologiya İnstitutunun dosenti, tibb üzrə fəlsəfə doktoru Xəyalə Təhməzi endometrioz xəstəliyinin klinik əlamətləri, diaqnostik yanaşmaları və müasir müalicə metodları haqqında geniş təqdimatla çıxış edib. O, həmçinin xəstəliyin qadın reproduktiv sağlamlığına təsiri, erkən diaqnostikanın əhəmiyyəti və fərdi terapiya planlarının hazırlanması barədə iştirakçıları məlumatlandırıb.

Sonda iştirakçıları maraqlandıran suallar cavablandırılıb.