Azərbaycan Tibb Universitetinin Hərbi Tibb fakültəsinin Tələbə Elmi Cəmiyyətinin təşəbbüsü ilə Ümummilli Lider Heydər Əliyevin 102, Azərbaycan Tibb Universitetinin 95 və Hərbi Tibb fakültəsinin 25 illik yubileyinə həsr olunmuş Brain Storm (Beyin Fırtınası) adlı intellektual bilik yarışması-viktorina keçirilib. 

ATU-dan Aztibb.az-a bildirilib ki, Feldşer hazırlığı kursunun kursantları arasında keçirilən viktorinanın məqsədi kursantların intellektual bilik səviyyələrinin yüksəldilməsi, komandada işləmək bacarıqlarının artırılması, liderlik qabiliyyətlərinin inkişaf etdirilməsi olub. 

Viktorinada Hərbi Tibb fakültəsinin feldşer kursantlarından ibarət "Matriks", "Triumf", "Əfsanə" və "Arsenal" komandaları Anatomiya, Normal fiziologiya, Daxili xəstəliklər, Hərbi səhra cərrahiyyəsi, Hərbi səhra terapiyası, Tibb xidmətinin təşkili və taktikası fənləri üzrə sualları cavablandırıblar. 

Gərgin mübarizə şəraitində keçən viktorina münsiflər heyəti tərəfindən yüksək qiymətləndirilib.

Komandalar arasında "Triumf" komandası daha fəal iştirak edərək viktorinanın qalibi olub.

Sonda qalib komanda və viktorinanın fəalları kubok, sertifikat və diplomla təltif ediliblər.