Tibb müəssisələrində göz xəstəliklərinin müayinə və müalicəsinin inkişaf etdirilməsi istiqamətində tədbirlərin görülməsi davam etdirilir.

 

TƏBİB-dən Aztibb.az-a verilən xəbərə görə, Göygöl Rayon Mərkəzi Xəstəxanasında ilk dəfə gözdə, əsasən, şəkərli diabet xəstəliyi ilə əlaqəli yaranan problemlərin müalicəsində istifadə edilən Avastin inyeksiyası icra olunub.

 

Avastin inyeksiyası, xüsusilə diabetik retinopatiya, yaşa bağlı makula degenerasiyası və retinal damar patologiyalarının müalicəsində geniş tətbiq olunan effektiv terapiya üsuludur. Bu müalicə metodu torlu qişada patoloji damarların proliferasiyasını və ekstravazasiya nəticəsində yaranan ödəmi azaldaraq, xəstələrin görmə funksiyasının qorunmasına və vizual reabilitasiyasına mühüm töhfə verir.

 

Qeyd edək ki, Göygöl Rayon Mərkəzi Xəstəxanasında Göz xəstəlikləri bölməsi fəaliyyət göstərir. TƏBİB tərəfindən bölmə müasir tibbi avadanlıqlarla, zəruri preparat və dərman vasitələrilə təchiz olunub. Bölmədə katarakta, xalazion, oteriqium, göz qapağında plastik əməliyyatlar, qapağın xaricə doğru qatlanması, gözdə müxtəlif travmalar, gözdən yad cisimlərin çıxarılması və d. əməliyyatlar icra edilməkdədir.

 

Əlavə edək ki, Göygöl Rayon Mərkəzi Xəstəxanası da daxil olmaqla, TƏBİB-in bütün tabeli tibb müəssisələrində icbari tibbi sığortanın Xidmətlər Zərfinə daxil edilən göz xəstəliklərinin müayinə və müalicəsi ödənişsiz qarşılanır.