103 Çağrı Mərkəzinə daxil olan zəng zamanı vətəndaşın ailə üzvləri təcili tibbi yardım briqadasına göstərdikləri operativ və peşəkar tibbi xidmətə görə dərin təşəkkürlərini bildiriblər.

 

Təcili və Təxirəsalınmaz Tibbi Yardım xidmətindən Aztibb.az-a verilən məlumata görə, zəngdə qeyd olunub ki, tibbi heyətin vaxtında və düzgün müdaxiləsi sayəsində pasiyentin vəziyyəti stabilləşdirilib və zəruri tibbi yardım vaxtında göstərilib.

 

Qeyd edək ki, 25.04.2025-ci il tarixində 03:50 radələrində 103 Çağrı mərkəzinə 73 yaşlı (qadın cinsli) şəxsdə boğulmanın, kəskin tənəffüs çatışmazlığının və yüksək təzyiqin olması səbəbilə çağırış daxil olub. Çağırış ünvanına təcili tibbi yardım briqadası cəlb olunub. Ünvanda yarım-oturaq vəziyyətdə olan şəxsdə tənginəfəslik, boğulma, tənəffüs çatışmazlığı, ritm pozğunluğu, yüksək hipertonik kriz şikayətləri qeydə alınıb. Xəstə müayinə edilib, oksigen inhalyasiya terapiyası aparılıb, vəziyyəti stabilləşdirilib. Monitor müşahidəsi altında xəstə tibb müəssisəsinə təxliyə olunub.