Aprelin 28-də Tərtər rayon Bəyimsarov kəndində Qərbi Azərbaycan İcmasının Qadınlar Şurası, Ağsaqqallar Şurası, İcbari Tibbi Sığorta Dövlət Agentliyi, TƏBİB və Tərtər Rayon İcra Hakimiyyətinin təşkilatçılığı ilə tibbi humanitar aksiya təşkil olunub.
Aztibb.az-a Tərtər RMX-dan verilən xəbərə görə, aksiyadan əvvəl iştirakçılar Qərbi Azərbaycandakı yurd yerlərimizlə bağlı fotosərgiyə baxıblar. İcmanın Qadınlar Şurasının sədri, Milli Məclisin deputatı Məlahət İbrahimqızı bu gün akademik Zərifə xanım Əliyevanın anadan olmasının 102-ci ildönümü olduğunu diqqətə çatdırıb, onun zəngin həyat yolundan, pedaqoji və həkimlik fəaliyyətindən, yüksək insani keyfiyyətlərindən danışıb.
Aksiya zamanı Bəyimsarov kəndində məskunlaşmış Qərbi Azərbaycan qaçqınlarının tibbi müayinəsi keçirilib. Müayinələr zamanı səhhətində problem aşkarlanan sakinlərə müvafiq tövsiyə və məsləhətlər verilib.
Kənd sakinləri müayinələrdən məmnunluqlarını ifadə edib, Qərbi Azərbaycana qayıdışı böyük inam və ümidlə gözlədiklərini diqqətə çatdırıblar.
Tədbir təşkilatçıları Bəyimsarov kəndində şəhidlər abidəsini ziyarət edib, şəhid ailələrinə baş çəkib, onlara müxtəlif sovqatlar çatdırıblar.
Qeyd edək ki, 1987-1991-ci illərdə Qərbi Azərbaycanda doğma yurdlarını tərk etmək məcburiyyətində qalan minlərlə soydaşımızın bir qismi Tərtərin Bəyimsarov kəndində məskunlaşıb.
