Qazaxıstanın Astana Tibb Universitetinin İctimai səhiyyə fakültəsinin tələbələri Azərbaycan Tibb Universitetində (ATU) təcrübə keçiblər.

Universitetdən Aztibb.az-a verilən xəbərə görə, ATU-da elmi məzuniyyətdə olan qazaxıstanlı tələbələr 3 həftəlik istehsalat təcrübəsini Epidemiologiya və biostatistika kafedrasında keçiriblər. Bu müddətdə onlar, kafedradaki dərs proqramları, universitetdəki şərait, imtahan prosesi ilə yaxından tanış olublar.

Tələbələrlə görüşən Epidemiologiya və biostatistika kafedrasının müdiri, əməkdar elm xadimi, professor İbadulla Ağayev onlara ATU-da təcrübə keçmələri haqqında müvafiq sertifikatlar təqdim edib.

ATU-da praktikada olan xarici tələbələr təcrübə haqqında təəssüratlarını bölüşüblər. Onlar üçün yaradılan yüksək dərs şəraiti və qonaqpərvəlik üçün ATU rəhbərliyinə öz minnətdarlıqlarını bildiriblər.

Qeyd edək ki, Bakıda səfərləri çərçivəsində tələbələr Respublika Gigiyena və Epidemiologiya Mərkəzində mütəxəssislər tərəfindən Respublika GEM-nin strukturu, şöbə, bölmə və laboratoriyalarının iş fəaliyyəti ilə tanış olublar və Respublika QİÇS-lə Mübarizə Mərkəzində istehsalat təcrübəsi keçiblər geniş məlumatlar əldə ediblər.