Ümumdünya Səhiyyə Təşkilatının (ÜST) Avropa üzrə komandasının rəhbəri Lauren MacDonald başçılıq etdiyi nümayəndə heyətində müxtəlif Avropa ölkələrindən mütəxəssislər iştirak edib.

 

Görüşdə Xəzər Tibb Mərkəzinin rəhbər şəxsləri, habelə müvafiq şöbə rəhbərliyi və əməkdaşları iştirak ediblər.

 

Bu barədə Aztibb.az-a Mərkəzdən xəbər verilib.

 

Bildirilib ki, görüşdə infeksion xəstəliklər sahəsində yeniliklər və qabaqlayıcı tədbirlər müzakirə olunub. Nümayəndələrə Azərbaycandakı səhiyyə sisteminin mövcud vəziyyəti, xüsusilə infeksion xəstəliklərə qarşı mübarizə aparan struktur və proqramlar barədə məlumatlar verilib.

 

İnteraktiv formada baş tutan görüş zamanı müəssisə əməkdaşları onları maraqlandıran sualları nümayəndə heyətinə ünvanlayıb.

 

Qeyd edək ki, Ümumdünya Səhiyyə Təşkilatının məqsədi infeksiyaların yayılmasının qarşısını almaq, səhiyyə sistemlərini inkişaf etdirmək və dünyanın müxtəlif bölgələrində tibbi mütəxəssislərin maariflənməsini təmin etməkdir.