Azərbaycan Tibb Universitetinin (ATU) İnnovasiya və keyfiyyətin idarə olunması şöbəsinin müdiri, dosent Aygün Babayeva “European Climate Resilient Health Systems” kursunu uğurla başa vurub. Kolumbiya Universitetinin (ABŞ) İqlim və Sağlamlıq Təhsili üzrə Qlobal Konsorsiumu və Avropa İctimai Səhiyyə Məktəbləri Assosiasiyası tərəfindən birgə təşkil olunan kursun məqsədi iqlim dəyişikliyi şəraitində səhiyyə sistemlərinin dayanıqlığını artırmaq üçün zəruri bilikləri paylaşmaqdan ibarətdir.

Bu barədə Aztibb.az-a ATU-dan məlumat verilib.

Qeyd olunub ki, proqram çərçivəsində iqlim dəyişikliyi şəraitində səhiyyə sistemləri, zəif tərəflərin və adaptasiya mexanizminin qiymətləndirilməsi,  fövqəladə halların qarşısının alınması və cavab tədbirləri, dayanıqlı inkişafın iqtisadi və tibbi faydaları kimi mövzular tədris olunub. Həmçinin, karbon izinin azaldılması üzrə strategiyalar, səhiyyə sistemində dayanıqlı texnologiyaların qiymətləndirilməsi, sistem dayanıqlılığının monitorinqi və qiymətləndirilməsi; idarəetmə, ədalət prinsipləri və iqlim fəaliyyəti; iqlim dəyişikliyi şəraitində tibbi kommunikasiya və s məsələlər müzakirə edilib.

Dosent Aygün Babayeva 10 həftəlik kursun sonunda keçirilən imtahanda yüksək nəticə qazanaraq  sertifikatla tətlif olunub.